నిలువెత్తు నిజాయితీకి నిత్యనివాళి

ప్రజల గుండెల్లో చిరస్థాయిగా నిలిచిన జువ్వాడి రత్నాకర్ రావు

( కాలగిరి శ్రీనివాస్ రెడ్డి, సీనియర్ జర్నలిస్ట్ )

నవగీతం, జగిత్యాల:

రాజకీయాల్లో గెలుపులు సాధించడం ఒక విషయం… ప్రజల మనసులు గెలుచుకోవడం మరో విషయం. కానీ పదవులు ముగిసిపోయిన తర్వాత కూడా ప్రజల గుండెల్లో జీవించడం మాత్రం చాలా అరుదైన నాయకులకు మాత్రమే సాధ్యమవుతుంది. అలాంటి అరుదైన ప్రజానాయకుల్లో మాజీ దేవాదాయ ధర్మాదాయ శాఖ మంత్రి జువ్వాడి రత్నాకర్ రావు పేరు చిరస్థాయిగా నిలిచిపోతుంది.

మే 10, 2026న ఆయన 6వ వర్ధంతి సందర్భంగా కోరుట్ల పట్టణంలోని ఆయన విగ్రహం వద్ద ఉదయం 11 గంటలకు నివాళులర్పించేందుకు అభిమానులు, ప్రజలు, నాయకులు, కార్యకర్తలు పెద్ద ఎత్తున తరలిరానున్నారు. ఇది కేవలం ఒక వర్ధంతి కార్యక్రమం కాదు… విలువల రాజకీయాలకు ప్రజలు అర్పించే గౌరవ నివాళి.

బుగ్గారం నియోజకవర్గంతో పాటు కోరుట్ల నియోజకవర్గ ఎమ్మెల్యేగా జువ్వాడి రత్నాకర్ రావు అందించిన సేవలు ఇప్పటికీ ప్రజల జ్ఞాపకాలలో సజీవంగా నిలిచాయి. అధికారాన్ని ఆయుధంగా కాకుండా బాధ్యతగా భావించిన నాయకుడు ఆయన.తెల్లని ధోతి, లాల్చీ, ఆరున్నర అడుగుల ఆకారం, నిండైన చిరునవ్వు… ఇవన్నీ ఆయన బాహ్య రూపమే. కానీ ఆ రూపం వెనుక ఉన్నది అపారమైన మానవత్వం.

అవినీతి, ఆక్రమాలు, రాజకీయ కక్షలు, దౌర్జన్యాలు తెలియని మనిషి ఆయన. ఎటువంటి బేషజాలు లేకుండా అందర్నీ కలుపుకొని పోయే వ్యక్తిత్వం ఆయనది. పేద – ధనిక తారతమ్యం లేకుండా సహాయం చేయడం ఆయన సహజ స్వభావం. అందుకే ఇప్పటికీ పెద్దలు ఆయన గురించి మాట్లాడేటప్పుడు ఒక మాట తప్పకుండా చెబుతారు.. “జువ్వాడి అంటే నమ్మకం… జువ్వాడి అంటే మనిషితనం.”

గత 25 ఏళ్లుగా జర్నలిస్టుగా ప్రజాజీవితాన్ని దగ్గరగా పరిశీలిస్తున్న నాకు, జువ్వాడి రత్నాకర్ రావు గారితో దాదాపు రెండు దశాబ్దాల అనుబంధం ఒక విలువైన అనుభవంగా మిగిలిపోయింది. రాజకీయాల్లో ఎందరో నాయకులను చూసిన నా జర్నలిస్టు ప్రయాణంలో, నిరాడంబరతకు నిజమైన నిర్వచనం చెప్పాలంటే ముందుగా గుర్తొచ్చే పేరు రత్నాకర్ రావుదే. అధికారంలో ఉన్నప్పుడు అహంకారం లేకుండా, పదవిలో ఉన్నా సాధారణ మనిషిలా ప్రజలతో కలిసిమెలిసి ఉండే ఆయన వ్యక్తిత్వాన్ని నేను అత్యంత సమీపంగా గమనించిన అదృష్టం నాకు దక్కింది. ప్రజల సమస్యలు విన్నప్పుడు ఆయన కళ్లలో కనిపించే ఆత్మీయత, సహాయం చేసే సమయంలో ఎలాంటి ప్రచారం కోరుకోని తత్వం, రాజకీయాల్లో విలువలు ఎంత ముఖ్యమో తన జీవితం ద్వారా చూపించిన తీరు — ఇవన్నీ నేటికీ నా మనసులో చెరగని ముద్ర వేసాయి. జర్నలిస్టుగా ఎన్నో కథనాలు రాసినా, జువ్వాడి రత్నాకర్ రావు వంటి మానవత్వం నిండిన నాయకుల గురించి రాయడం మాత్రం ఒక బాధ్యతగా, గౌరవంగా భావిస్తాను.

నేటి రాజకీయాల్లో ప్రజలకు దగ్గర కావడానికి భారీ ప్రచారాలు అవసరమవుతున్నాయి. కానీ రత్నాకర్ రావు కాలంలో ప్రజల హృదయాల్లో స్థానం సంపాదించడానికి ఆయనకు కావలసింది కేవలం నిజాయితీ, అందుబాటు, మానవత్వం మాత్రమే.

ఆయన చూపిన ఆ విలువల బాటలోనే నేడు ఆయన కుటుంబం కూడా ప్రజల మధ్య కొనసాగుతోంది. ఆయన తనయుడు జువ్వాడి నర్సింగారావు ఇటీవల వెలుమ కార్పొరేషన్ రాష్ట్ర అధ్యక్షుడిగా బాధ్యతలు చేపట్టి, కోరుట్ల కాంగ్రెస్ నియోజకవర్గ ఇన్‌చార్జిగా చురుకుగా కొనసాగుతున్నారు. తండ్రి వారసత్వాన్ని కేవలం రాజకీయంగా కాకుండా ప్రజాసేవగా ముందుకు తీసుకెళ్తున్నారు.

అలాగే ఆయన తమ్ముడు జువ్వాడి కృష్ణారావు కూడా ప్రజలకు ఎప్పుడూ అందుబాటులో ఉంటూ విశేష సేవలు అందిస్తున్నారు. ఆపదలో ఉన్న వారికి అండగా నిలబడటం, అవసరమైనప్పుడు సహాయం చేయడం, ప్రతి ఇంటికి చేరువ కావడం ద్వారా నియోజకవర్గ ప్రజల మన్ననలు పొందుతున్నారు.

నేడు కోరుట్ల నియోజకవర్గంలో “జువ్వాడి బ్రదర్స్” అనే పేరు ఒక విశ్వాసానికి ప్రతీకగా మారింది. ఇద్దరు అన్నదమ్ములు తలలో నాలుకలా ప్రజల మధ్య తిరుగుతూ, కష్టసుఖాల్లో అండగా నిలుస్తూ, ప్రతి వర్గానికి అందుబాటులో ఉంటూ ప్రజల మనసుల్లో ప్రత్యేక స్థానం సంపాదించుకున్నారు. ఇది కేవలం ఒక రాజకీయ కుటుంబం కథ కాదు… ప్రజలతో బంధాన్ని కొనసాగించిన ఒక విలువల వారసత్వం. రాజకీయాల్లో పదవులు శాశ్వతం కావు.కానీ ప్రజల గుండెల్లో నిలిచే పేరు మాత్రం శాశ్వతం. జువ్వాడి రత్నాకర్ రావు అదే సంపాదించారు.

నేడు రాజకీయాలు మారిపోయాయి.ప్రచారం పెరిగింది… కానీ ప్రజలకు దగ్గరైన నాయకత్వం తగ్గిపోయింది. ఇలాంటి సమయంలో జువ్వాడి రత్నాకర్ రావులాంటి నాయకుల జ్ఞాపకం ప్రజలకు మరింత విలువైనదిగా మారుతోంది. ఎందుకంటే ఆయన రాజకీయాలు అధికారానికి కాదు.. ఆపన్నులకు అండగా ఉండటానికి చేశాడు.

ఆయన భౌతికంగా దూరమైనా… ఆయన నడిచిన దారి ఇంకా ప్రజల మధ్యే ఉంది.ఆయన పేరు ఇంకా నమ్మకానికి చిరునామా. ఆయన కుటుంబం ఇంకా సేవకు ప్రతీక జువ్వాడి రత్నాకర్ రావు వంటి నాయకులు చరిత్ర పుటల్లో మాత్రమే కాదు… ప్రజల హృదయాల్లో శాశ్వతంగా జీవిస్తారు.