నవగీతం,కోరుట్ల ప్రతినిధి.
నేడు అంతర్జాతీయ మాతృ దినోత్సవం ప్రత్యేక కథనం. ఈ ప్రపంచంలో ‘అమ్మ’ అనే రెండక్షరాల పిలుపులో ఉన్న మాధుర్యం మరే పిలుపులోనూ ఉండదు.
సృష్టికి మూలం అమ్మ.
అసలు నిర్వచనం లేని ప్రేమకు నిలువెత్తు రూపం అమ్మ. మన కంటికి కనిపించే దైవం ఎవరైనా ఉన్నారంటే అది ఖచ్చితంగా అమ్మే.
బిడ్డ పెదవిపై చిరునవ్వు కోసం తన సర్వస్వాన్ని ధారపోసే త్యాగశీలి అమ్మ.
త్యాగానికి మరో పేరు అమ్మ.
ఒక జీవిని భూమి మీదకు తీసుకురావడానికి అమ్మ పడే ప్రసవ వేదన వర్ణనాతీతం.
ఆ బాధను చిరునవ్వుతో భరిస్తూ, బిడ్డ ముఖం చూడగానే తన కష్టాన్ని మర్చిపోయే గొప్ప మనసు అమ్మది.
బిడ్డ ఆకలి తీర్చడానికి తను పస్తులుండటం,
బిడ్డ భవిష్యత్తు కోసం తన కలలను త్యాగం చేయడం కేవలం ఒక అమ్మకే సాధ్యం.
తొలి గురువు అమ్మ.. నిత్య రక్షకురాలు అమ్మ.
మనం మాట్లాడే మొదటి మాట నుంచి, వేసే మొదటి అడుగు వరకు ప్రతిదాని వెనుక అమ్మ ప్రోత్సాహం ఉంటుంది.
లోకాన్ని ఎలా చూడాలో నేర్పే తొలి గురువు అమ్మ. మనం ఎంత ఎదిగినా, ఏ హోదాలో ఉన్నా అమ్మ దృష్టిలో ఎప్పుడూ చిన్న పిల్లలమే.
మనకు చిన్న దెబ్బ తగిలినా తన కళ్లల్లో నీళ్లు తిరుగుతాయి.
ఆపదలో ఉన్నప్పుడు మనకు తెలియకుండానే నోటి నుంచి వచ్చే మొదటి పదం ‘అమ్మ’.
నేటి కాలంలో అమ్మకు మనం ఇచ్చే గౌరవం ఏమిటి? సాంకేతికత పెరిగిపోయి, ఉరుకుల పరుగుల జీవితంలో మనకు జన్మనిచ్చిన అమ్మను పలకరించే తీరిక కూడా లేకుండా పోతోంది.
‘మదర్స్ డే’ అంటే కేవలం సోషల్ మీడియాలో ఫోటోలు పెట్టి, విష్ చేయడం మాత్రమే కాదు.
ఆమె ఆరోగ్య స్థితిగతులను అడిగి తెలుసుకోవడం, రోజులో కనీసం పది నిమిషాలు ఆమెతో మనసు విప్పి మాట్లాడటం, వృద్ధాప్యంలో ఆమెకు తోడుగా నిలవడం…
ఇవే మనం అమ్మకు ఇచ్చే అసలైన బహుమతులు. “అమ్మంటే ఒక వ్యక్తి కాదు..
అదొక శక్తి. ప్రాణం పోసే ప్రాణం అమ్మ.”
అమ్మ ప్రేమకు వెల కట్టలేం.
ఆమె రుణం ఈ జన్మలో తీర్చుకోలేం.
కానీ, ఆమెను సంతోషంగా ఉంచడం మాత్రం మన చేతుల్లోనే ఉంది.
ఈ మాతృ దినోత్సవం సందర్భంగా ప్రతి ఒక్కరూ తమ తల్లికి ఇచ్చే అతిపెద్ద గౌరవం ఆమెను ప్రేమగా చూసుకోవడమే. లోకంలోని తల్లులందరికీ ‘మాతృ దినోత్సవ’ శుభాకాంక్షలు!
….వనతడుపుల సంపత్
